नागपूर : कोरोना या विषाणूचा मुकाबला म्हणजे जागतिक युद्ध आहे. याचा सामना करण्यासाठी राज्यातील जनता निश्चितपणे शासनाला सहकार्य करत आहे. त्यामुळे आपण ही साथ अजून तरी नियंत्रणात ठेवली आहे. मात्र, आणखीही शर्थीचे प्रयत्न केले तर महाराष्ट्र या संकटावर मात करेल. मी पंतप्रधान नरेंद्र मोदी आणि केंद्रीय आरोग्यमंत्र्यांशी यासंदर्भात बोललो असून त्यांनी राज्याला पुरेपूर सहकार्य केले जाईल, असे आश्वासन दिले आहे.
राज्य सरकार ज्या ज्या सूचना देत आहे त्या सूचना नागरिकांनी काटेकोरपणे पाळल्या पाहिजेत. आमच्या आवाहनानंतर सर्वधर्मीयांच्या प्रार्थनास्थळांवर गर्दी खूप कमी झाली आहे. मात्र तरीदेखील आपण गर्दी पूर्ण बंद केली पाहिजे. सरकारने शासकीय कार्यालय, खासगी कार्यालयांतील कर्मचाऱ्यांची उपस्थिती कमी करण्याचा निर्णय घेतला आहे तरीसुद्धा आवश्यकता नसेल तर घराबाहेर पडू नका. जिथे शक्य आहे तिथे वर्क फ्रॉम होम या पद्धतीने काम करा. आपण ज्या उपाययोजना करत आहोत त्या समाधानकारक असल्या तरी विषाणू एकेक पाऊल पुढे टाकत असल्याने अधिक काळजी घेतली पाहिजे. यंत्रणेमध्ये काम करणारीही माणसेच आहेत. त्यांच्यावरचा भार वाढेल असे कृत्य आपल्याकडून व्हायला नको.
बाहेरचे लाेक आपलेच
आज सर्वच रुग्ण बाहेरून लागण झालेले आहेत. बाहेरचे लोकदेखील आपलेच आहेत, नातेवाईक आहेत. मात्र त्यांनी इथे येताना सर्व काळजी घेऊन येणे महत्त्वाचे आहे. होम क्वाॅरंटाइन करणाऱ्यांच्या हातांवर शिक्के मारले आहेत, त्यांनीदेखील आसपास वावरू नये. युद्ध हे जिद्दीने लढायचे असते आणि जिंकायचे असते, अनेकांनी १९६५ आणि १९७१ चे युद्ध पाहिले असावे, अनुभवले असावे.
युद्धाचा अनुभव वाईट असतो. युद्धानंतरची परिस्थिती वाईट असते. त्यामुळे या संकटाचा सामना करण्यासाठी राज्यातील जनता निश्चितपणे सरकारला साथ देईल, असा विश्वासही मुख्यमंत्री उद्धव ठाकरे यांनी या वेळी व्यक्त केला.
आपण नक्की या संकटातून बाहेर पडू.
देशासाठी छातीचा कोट करून आपले जवान लढतात, धारातीर्थी पडतात. कोरोनाशी ज्या पद्धतीने लढतो आहोत त्यावरून मला १९७१ चे युद्ध आठवते. आजचे युद्ध हे विषाणूशी युद्ध आहे. ‘वॉर अगेन्स्ट व्हायरस’ युद्ध सुरू झाले आहे. आपले जवान म्हणजे आपले डॉक्टर, नर्सेस, बसचे चालक, स्वयंसेवी सामाजिक संस्था यासाठी दिवसरात्र काम करत आहेत. आपण त्यांना घरी राहून सहकार्य करू शकत नाही का? चीनमध्ये या विषाणूचा पहिल्यांदा प्रादुर्भाव आढळला, पण आता चीनने अनेक कडक उपाययोजना केल्यामुळे यातून ते बाहेर पडत आहेत. आपल्यालाही बाहेर पडायचे आहे. त्यासाठी पुन्हा एकदा सहकार्य करा, आपण नक्की या संकटातून बाहेर पडू, असा विश्वासही मुख्यमंत्री ठाकरेंनी बोलून दाखवला.
